KAAPSTAD. – ’n Moontlike passiemoord het ’n 12-jarige seun sonder
sy gesin gelaat nadat sy swanger ma, driejarige sussie en tannie in
hul huis in Guguletu met kopskote doodgeskiet is.
’n Man (35) van die Kongo is kort na dié voorval vir ondervraging
in hegtenis geneem.
Me. Petronella Mkona (31), haar dogtertjie Latoya, en suster, me.
Charmaine Mkona (38), is omstreeks 01:30 gisteroggend dood op die
sitkamerbanke in die pienk TV-kamer gevind.
Bure het omstreeks 01:00 skote gehoor, maar was onseker waar
presies dit vandaan kom.
’n Vriendin wat in die Mkona-gesin se agterplaas woon, het hulp
by die bure gaan soek toe sy vermoed het die skote is in die huis
geskiet.
Die rooi voordeur van die sementhuis in NY 89, nr. 142, het
oopgestaan toe die vriendin en ’n buurvrou gaan kyk het wat
aangaan.
Hulle het op die liggame van die twee vroue, met Latoya in haar
ma se arms, in die TV-kamer afgekom. Die televisie was nog aan.
Me. Letticia Qove, ’n buurvrou, het die polisie gebel. Volgens
haar was Petronella Mkona ses maande swanger met haar derde kind.
Haar 12-jarige seun, Thando, het die slagting oorleef.
Hy – en die sewe ander inwoners wat geslaap het tydens die
skietery – ontvang tans berading by die Guguletu-polisie.
Volgens supt. Billy Jones, ’n polisiewoordvoerder, is die
verdagte gisteroggend naby Nyanga Junction in hegtenis geneem. Hy
word aangekla van moord en sal tot met sy hofverskyning by die
Guguletu-polisieselle aangehou word.
Al drie slagoffers het ’n enkele skietwond in die kop, het Jones
gesê.
’n Goeie vriendin van die Mkona-gesin, me. Emelda Diamond, het in
trane gesê sy is briesend vir die verdagte. Die man en me.
Petronella Mkona het glo vir amper tien jaar ’n aan-en-af-verhouding
gehad. Hy word deur dié wat hom ken as ’n aggressiewe man
beskryf.
Diamond kon nie sê waar presies die man woon nie, maar hy is glo
afkomstig van die Kongo.
Volgens haar was Mkona baie bang vir hom en het nie geweet hoe om
die verhouding finaal te beëindig nie. Sy is ook glo voorheen
verskeie kere deur hom gedreig en aangerand.
Me. Charmaine Mkona laat twee seuns van 13 en 17 jaar oud
agter.
Vriende en bure het gister geskok saamgedrom in die TV-kamer.
“Ons is so geskok. Ons het nooit gedink hy sal so iets aan haar
(Petronella) en haar familie doen nie.”